Në horizont kantoni i ri, “Harku i Jura-s”?

Me kantonin e ri besohet se do të ketë përfitime ekonomike, tatime më të ulëta dhe peshë më të madhe në federatë

Përfaqësues nga kantonet Jura, Neuchatel dhe nga pjesë të kantonit të Bernës (Jura berneze), kanë themeluar një shoqatë që është hapi i parë i krijimit, në të ardhmen të një kantoni të madh të përbërë nga regjionet në fjalë.

Kantoni i ardhshëm do të mbante emrin „Harku i Jura-s”, emër që mban edhe shoqata e posathemeluar „Association pour un canton de l´Arc jurassien”.

Në mbledhjen themeluese që është mbajtur të shtunën në Le Noirmont të kantonit Jura kanë marrë pjesë tridhjetë aktivistë. Në kryesinë e shoqatës ata kanë zgjedhur, veç të tjerëve edhe deputetin e dhomës së kantoneve nga FDP-ja, Raphaël Compte. Ndërkaq planin e punës pritet ta bëjë ish drejtori i Entit Federal për Planifikim hapësinor, Pierre-Alain Rumley, që është dhe ideator i kantonit të përmendur, njofton blick.ch.

Përmes krijimit të një kantoni të përbashkët të regjioneve të Jura-s, iniciatorët besojnë se “Canton de l´Arc jurassien” do të ketë përfitime ekonomike, tatime më të ulëta dhe peshë më të madhe në federatë.

Në një sondazh të bërë kohë më parë nga disa medie frankofone të Zvicrës, rreth 60 për qind të të pyeturve janë shprehur në favor të krijimit të kantonit të madh i cili do të bashkonte kantonet ekzistuese dhe regjionet që kanë të përbashkët emërtimin “Jura”.