Në momentin e fundit Klaudia i shpëton dëbimit në Kosovë

Ka jetuar 25 vjet ose nga mosha 4 vjeçare në Gjermani dhe do të dëbohej në Kosovë pasi që ishte e papunë. Për shkaqe humanitare, asaj i vazhdohet qëndrimi

Klaudia Q., një kosovare 29 vjeçe, duket se në momentin e fundit ka shpëtuar nga dëbimi në Kosovë. Komisioni për raste të rënda ka vendosur njëzëri që kosovarja të mbetet në Gjermani ndërsa fjalën e fundit për këtë pritet ta japë ministrja e brendshme e landit Saarland.

Ajo që e bën të veçantë rastin e Klaudia Q. është se kosovarja jeton në Gjermani prej 25 vitesh ose që nga mosha 4 vjeçare . këtu ajo ka vazhduar shkollimin, gjegjësisht ka përfunduar shkollimin bazë për zanate. Prindërit dhe vëllezërit e motrat e saj jetojnë në Saarbrücken dhe të gjithë kanë leje të rregullt qëndrimi në Gjermani. Ndërkaq, pasi që Klaudia nuk kishte punë dhe kështu nuk mund të mbante veten financiarisht, të gjitha instancat gjyqësore kishin vendosur që ajo të braktiste Gjermaninë.

Para gjashtë javësh Klaudia madje ishte dërguar në Frankfurt prej nga me aeroplan do të transportohej për në Kosovë. Por, pasi që rasti i saj u bë publik, ministrja e brendshme e Saarlandit, Bachmann, për shkaqe humanitare e kishte ndalur në momentin e fundit dëbimin në Kosovë.