Në Shqipëri po shtohet me të madhe numri i të prekurve nga tumori

Brenda 12 vjetësh përhapja për të sëmurët me tumor në Shqipëri është rritur për 70%, e madje është vënë re që gjithnjë e më shumë po preket edhe grupmosha 20-40 vjeç.

Këto shifra alarmante janë publikuar gjatë konferencës së radiologjisë dhe kimioterapisë, ku u diskutua edhe për mundësitë e kurimit me metodat e preparatet moderne, përcjell albinfo.ch.

Por, përpos numrit në rritje, mjekët janë të shqetësuar se po preket grup mosha e re 20-40 vjeç. Gratë shihet të jenë më të prekura. Ekspertët në Spitalin Onkologjik pohuan se ndotja e mjedisit dhe dieta ushqimore janë faktorë përgjegjës për sëmundjen e kancerit, që është në rritje, shkruan “Gazeta Shqiptare”.

Ata pohojnë se rastet më të shumta janë në zonat e ndotura të vendit, sidomos në qytetet industriale, si Elbasani, Fieri dhe zonat kufitare, sidomos ato me Kosovën, ku ka pasur ndotje në kohën e luftës.

Shefja e Onkologjisë në QSUT, Silvana Çeliku, ka thënë se në Shqipëri sëmundja e kancerit mund të mbahet në nivele të ulëta nëse rritet kontrolli mbi sigurinë ushqimore, të frenohet duhanpirja dhe të ulet ndotja në mjedis.