Në Venedik, vetëm me biletë speciale?

Për të kufizuar fluksin e turistëve autoritetet e qytetit po e diskutijnë mundësinë që turistët që duan ta vizitojnë qytetin e tyre, të paguajnë më parë biletën.

A do të bëhet qyteti i “dashnorëve të Venedikut” një “qytet i ndaluar”? Plotësisht i ndaluar me siguri jo, por kufizimet e numrit të vizitorëve tashmë po shihen në horizont…

Fluksi i madh e i pandalshëm i turistëve që duan të vizitojnë Venedikun i ka bërë krerët e qytetit të njohur italian që të hulumtojnë për zgjidhje praktike të këtij problemi. Kështu, ata janë duke e diskutuar tashti mundësinë që turistët që duan ta vizitojnë qytetin e tyre, të paguajnë më parë biletën.

Në këtë mënyrë, përmes një “numer clausus”-i të llojit të vet, mendohet të kufizohet numri i kureshtarëve për të parë qytetin e ndërtuar në lagunën e Italisë së veriut.

“Numri i turistëve duhet programuar”, ka thënë Paolo Costa, ish kryebashkiak i Venedikut dhe aktualisht kryetar i autoritetit të portit të qytetit. Sipas tij duhet përcaktuar një numër maksimal të turistëve që u lejohet të vizitojnë Venedikun në baza ditore, dhe të futet detyrimi për të nxjerrë një biletë , thotë Costa.

“Falë teknologjisë moderne, sot është e mundshme të vihet mbikëqyrje mbi fluksin e turistëve, citohet Paulo Costa të ketë thënë për gazetën e përditshme nga Roma “La Repubblica”.