Nesër varroset polici, shpallet ditë zie

Kryeministri i Kosovës, Ramush Haradinaj, ka treguar se nesër do të varroset polici i vrarë dje në Istog pas një shkëmbimi zjarri me një person që tentoi ta grabisë bankën.

Haradinaj ka thënë se nesër e gjithë Kosova do të jetë në ditë zie për nder të policit Izet Demaj.

Ai madje ka thënë se familja e policit të vrarë do ta ketë gjithë përkrahjen e shtetit, përcjell albinfo.ch.

“Dje ka qenë një ditë e ndjeshme. Dje u vra një polic në detyrë si dhe sulmuesi i involvuar në plaçkitje. Polici ka shtirë në mbrojtje të vetes, rendit dhe e ka paguar me jetë, si dhe sulmuesi. E falënderoj drejtorin për menaxhimin e gjendjes në ditën e djeshme. Po ashtu i jap përkrahje policisë”, ka thënë Haradinaj.

“Do t’i marrim të gjitha veprimet që policia të ketë përkrahje. Nesër do të shpallet ditë zie për Kosovën kur edhe është dita e varrimit. Do të marr pjesë në varrim nesër që të jemi afër familjes në të gjitha kërkesat e familjes. Ligjet kanë avancuar dhe në ditët e para të janarit do të procedohen këto ligje. Shembulli i djeshëm është për të gjithë që, ligji është ligj. Kemi filluar procesin për shtimin e efektivëve. Po shihet që jemi të ekspozuar, një pjesë e mirë e tyre ka karrierë të bujshme kriminale edhe në Perëndim”, theksoi ai.