Nga 15 vjet burg për vullnetarët në Siri

Qeveria e Kosovës ka miratuar një Projektligj, i cili ndalon pjesëmarrjen nëpër konfliktet e ndryshme të botës. Shkelja e këtij ligji sanksionohet me 15 vjet burg

Qeveria e Kosovës ka miratuar të mërkurën një Projektligj kundër pjesëmarrjes së kosovarëve nëpër konfliktet e armatosura jashtë territorit të Republikës. Ky ligj kryesisht ka të bëj me vullnetarët kosovarë në luftën e Sirisë, të cilët sipas ligjit, rrezikojnë nga 15 vjet burg.  

Ky projektligj është prezantuar nga ministri i Punëve të Brendshme, Bajram Rexhepi, i cili tha se projektligji bëhet me qëllim të mbrojtjes së interesit shtetëror dhe të sigurisë kombëtare.

 “Ligji përcakton veprën penale të bashkimit apo pjesëmarrjes në ushtritë ose policitë e huaja, në formacionet e jashtme paraushtarake ose parapolicore, në organizimet grupore apo individuale në çfarëdo forme të konflikteve të armatosura jashtë territorit të Republikës së Kosovës”, deklaroi Rexhepi.

 Qeveria e Kosovës, siç thuhet synon t’i jepet fund praktikës kur kosovarët marrin pjesë në luftëra jashtë vendit. Gjithçka është iniciuar pasi që shumë të rinj nga Kosova u nisin për në Siri, për të luftuar krah rebelëve të atjeshëm.

 “Qeveria e Kosovës miratoi projektligjin përmes se cilit bashkimi në konfliktet e armatosura jashtë territorit të vendit konsiderohet vepër penale dhe e dënueshme deri në 15 vjet burg”, ka shkruar në facebook, ministria e Integrimit Vlora Çitaku.

 Ndryshe, Qeveria e Kosovës miratoi edhe Projektligjin për Veteranët e Ushtrisë Çlirimtare të Kosovës. Ky projektligj përfshinë të drejtat dhe benificionet për të gjithë ushtarët e Ushtrisë Çlirimtare të Kosovës, ushtarëve të Kosovës, në të gjitha periudhat që nga fillimi i rezistencës së armatosur, deri në çlirimin definitiv të Kosovës.

 “Me këtë projektligj përcaktohet qartë se institucionet e Republikës së Kosovës, Qeveria e Kosovës, do të merr obligimet e tyre ndaj të gjithë kësaj sakrifice ndaj të gjithë atij kontributi. Jemi të vendosur që asnjë personi, asnjë qytetari, asnjë veterani, edhe kontributin më të vogël apo edhe vetëm një orë nëse ka qenë, të mos i hyhet në hak akujt”, tha kryeministri Hashim Thaçi.

 Ky projektligj, siç tha ai, do të jetë një projektligj, i cili afirmon vlerat e luftës çlirimtare dhe afirmon kuptimin edhe të unitetit politik dhe qytetar.