Lajme

Mbyllja e restoranteve, deri në fund të shkurtit, pritet ashpërsim i mëtejmë

Qeveria ka njoftuar një zgjatje të mbylljes së restoranteve deri në fund të shkurtit. Por vendimi për këtë nuk është është ende përfundimtar

Deri më tani, kantonet që kishin zhvillime më të favorshme epidemiologjike kishin mundësi të vendosnin për përjashtime nga masat e koronavirusit, gjegjësisht për zbutje të tyre.

Por, tani kësaj i ka ardhur fundi pasi që Këshilli Federal ka shfuqizuar urdhëresën përkatëse që rregullonte këtë çeshtje.

Kështu, duke filluar nga 9 janari, restorantet, objektet kulturore dhe sportive  si dhe ato të kohës së lirë në të gjithë Zvicrën duhet të qëndrojnë të mbyllura pa përjashtim. Këto dhe disa masa të tjera i ka prezantuar ministri i shëndetësisë, Alain Berset në konferencën për media që po vazhdon të mbahet në qendrën federale të mediave Bernë.

Përveç kësaj, qeveria ka njoftuar një zgjatje të mbylljes së restoranteve deri në fund të shkurtit. Por vendimi për këtë nuk është është ende përfundimtar, transmeton albinfo.ch.

Është gjithashtu i mundur edhe një shtrëngim i mëtejshëm, drastik i masave. Për propozimet përkatëse në këtë drejtim po zhvillohen konsultime me kantonet.

Bëhet fjalë për masat si: detyrim për të punuar nga shtëpia, mbyllje të dyqaneve dhe rregulla të tjera për takime private dhe publike. Në të njëjtën kohë, Këshilli Federal u kërkon kantoneve të marrin në konsideratë se çfarë masash do të merren në shkollat ​​e detyrueshme – nëse tregohet i nevojshëm shtrëngimi i mëtejshëm.

Për të gjitha këto, Qeveria Federale do të marrë një vendim përfundimtar të mërkurën e ardhshme, më 13 janar.