Nga sot, Zvicra do të heqë të gjitha masat për Covid

Nga e premtja, 1 prill, Zvicra do të heqë masat përfundimtare për Covid. Do të shënojë herën e parë në dy vjet që kombi ka qenë i lirë nga rregullat e Covid

Vendimi, i cili u njoftua të mërkurën pasdite, ishte marrë më parë nga qeveria në shkurt me kusht që situata epidemiologjike të mbetej e qëndrueshme.

Dy rregullat e lidhura me Covid-in që janë ende në fuqi – detyrimi për të mbajtur maskë në transportin publik dhe në institucionet shëndetësore, si dhe për të izoluar për pesë ditë në rast infektimi – do të bien nga 1 Prilli, përcjell albinfo.ch.

Kushdo që rezulton pozitiv nuk do të ketë më nevojë të izolohet, megjithëse qeveria i ka inkurajuar njerëzit ta bëjnë këtë kudo që të jetë e mundur.

Për më tepër, maskat tani nuk kërkohen më askund në Zvicër, duke përfshirë në dyqane dhe në transportin publik, megjithëse linjat e tranzitit me lidhje ndërkombëtare mund t’u kërkojnë njerëzve të mbajnë maska.

“Një situatë e mirë”

Kur bëri njoftimin, ministri zviceran i Shëndetësisë Alain Berset tha “Jemi në një situatë të mirë. Kriza nuk ka mbaruar. Por faza e keqe e krizës ka mbaruar”.

Berset tha se megjithëse planet janë në vend në rast të përkeqësimit të situatës, “qeveria federale nuk po planifikon të kthehet në situatën e mëparshme”, përcjell tutje albinfo.ch.

Infeksionet me Covid janë ende të shfrenuara – pse po hiqen të gjitha masat?

Qeveria tha se ndikimi i përhapur i vaksinimit si dhe varianti më i dobët Omicron kishte bërë që masat të mos ishin më të nevojshme.

Gjithashtu, lehtësimi i masave në muajin shkurt, ndërkohë që ka çuar në rritje të infeksioneve, nuk ka rezultuar në rritje të dukshme të shtrimeve në spital apo të viktimave.

Qeveria zvicerane megjithatë tha se njerëzit duhet të jenë gati për “valët sezonale të sëmundjeve në të ardhmen”.

Qeveria tha se do të punojë me kantonet për të vendosur një plan për këto valë sezonale, i cili do të zbatohej përpara vjeshtës.

Ashtu si më herët në pandemi, kantonet janë të lira të vendosin masa për Covid nëse e shohin të arsyeshme.

 

---