Ngrihet aktakuzë ndaj Bislimit, Lushtakut, Beqës dhe Haxhiut për përleshjen në Kuvend

Prokuroria Themelore e Prishtinës ka ngritur aktakuzë ndaj zëvendëskryeministrit të Kosovës, Besnik Bislimi, deputetëve të Partisë Demokratike të Kosovës, Mërgim Lushtaku, Hajdar Beqa dhe Bekim Haxhiu.

Sipas njoftimit, ata akuzohen se kanë marrë pjesë në përleshjen gjatë seancës së Kuvendit të Kosovës, që u zhvillua më 13 korrik 2023.

“Sipas aktakuzës, të pandehurit B.B., M.L., H.B., ngarkohen për veprën penale “Sulmi”, ndërsa i pandehuri H.B., gjithashtu ngarkohet me veprën penale “Asgjësimi apo dëmtimi i pasurisë”. Po ashtu, në këtë çështje penale për të pandehurin B.H., ekziston dyshimi i bazuar mirë se ka kryer veprën penale “Lëndimi i lehtë trupor”. Prokurori i Shtetit me rastin e ngritjes së aktakuzës i ka propozuar Gjykatës që të pandehurit të shpallen fajtorë dhe të dënohen sipas ligjit për veprat penale të cilat iu vihen në barrë”, thuhet në njoftim, përcjell albinfo.ch.