Obeziteti dyfishon rrezikun për nxjerrje të gjurit nga vendi

Sipas një studimi të publikuar në “Journal of Orthopaedic Trauma”, ka rritje të dislokimeve të gjurit, sidomos te pacientët obezë

Obeziteti rrit mundësitë për nxjerrje nga vendi të gjurit, dhe nëse nuk trajtohet si duhet mund të shpie edhe në amputim të këmbëve.

Sipas një studimi të publikuar në “Journal of Orthopaedic Trauma”, ka rritje të dislokimeve të gjurit, sidomos te pacientët obezë.

Hulumtimi u bazua në më shumë se 19 mijë raste në SHBA mes viteve 2000 dhe 2012.

Nxjerrjet e gjurit nga vendi ndodhin kur ka probleme me ligamentet në nyje. Një shembull i rasteve më të shpeshta është kur një person bie në tokë dhe nuk peshon në vendin e duhur, shpjegon Dr. Joey Johnson, autor i hulumtimit, transmeton Albinfo.ch.

Në bazë të studimit, ekipi shkencor kalkuloi nga të dhënat se shanset për nxjerrje të gjurit nga vendi janë dyfish më të mëdha te obezët se sa te njerëzit me peshë normale. Për më shumë, dislokimi i gjurit te obezët shkaktonte probleme edhe në arterien kryesore të këmbës, që mund të shpijë në amputim nëse nuk trajtohet në kohën e duhur.