Kriza në Ukrainë

OKB: Rreth 5 milionë civilë janë larguar nga Ukraina

Organizata e Kombeve të Bashkuara (OKB) deklaroi se rreth 5 milionë civilë janë larguar nga Ukraina, për shkak të luftës me Rusinë.

Që nga 24 shkurti, kur Rusia nisi agresionin ushtarak, janë larguar kryesisht gra dhe fëmijë, sipas Komisionerit të Lartë të Kombeve të Bashkuara për Refugjatët, raporton BBC.

Ndërsa, Organizata Ndërkombëtare për Migracionin në OKB, njoftoi se rreth 215 mijë shtetas të vendeve të treta, kryesisht studentë dhe emigrantë, janë larguar gjithashtu nga Ukraina për në vendet fqinje.

Më herët gjatë ditës së sotme, Presidenti i Ukrainës, Volodimir Zelenski, ftoi për vizitë homologun francez, Emanuel Makron, për të parë ‘mizoritë ruse’ në shtetin që drejton.

Makron ka hezituar të përdorë fjalën gjenocid, duke deklaruar se ai “nuk ishte i sigurt se një përshkallëzim i retorikës i shërben kësaj kauze”.