OKB synon ndryshimin e imazhit të migracionit

(AP Photo/Darko Bandic)

Drejtoresha e re e përgjithshme e Organizatës Ndërkombëtare për Migracionin, Amy Pope, theksoi sot përfitimet e migracionit të ligjshëm dhe u zotua të kundërshtojë imazhin negativ në shumë vende të destinacionit.

Pope, e cila zëvendësoi António Vitorino në krye të organit të OKB-së, tha një ditë pas marrjes së detyrës se kërkohej një sistem që do t’i lejonte migrantët dhe vendet e destinacionit të përfitonin.

“Migrimi i ligjshëm ishte i mirë për ekonominë dhe duhet të promovohet”, tha Pope, transmeton dpa, përcjell albinfo.ch.

Ajo vuri në dukje prova bindëse se migrimi gjeneron prosperitet, promovon inovacionin dhe mund të ndihmojë shoqëritë në plakje.

“IOM-i, i cili financohet nga 175 shtetet anëtare, do t’i kushtojë vëmendje sektorit privat që mbështet migrimin për të mbledhur më shumë fonde”, tha ajo.

Pope vlerësoi përpjekjet e organizatave private për shpëtimin e migrantëve me varka në rajonin e Mesdheut.

“Ne vlerësojmë punën e kujtdo që mbështet migrantët në vështirësi”, tha ajo.

Ajo renditi shkaqet e migrimit si ndryshimet klimatike, dhuna dhe mungesa e perspektivës.

Mungesa e rrugëve ligjore i shtyu migrantët të aplikonin për azil në një proces që kërkonte kohë dhe shpesh çoi në refuzime. Kjo mbingarkoi sistemet e azilit të nevojshëm për njerëzit që përballen me persekutim ne vendet e tyre”, shtoi Pope.