Olluri: Për sulmin ndaj Kajtazit, arrestohet një shok i Milaim Zekës

Policia e Kosovës menjëherë ka arrestuar Faton Ramadanin, familjar i vëllezërve Kiçina, të dënuar me më shumë se 100 vjet për një vrasje të katërfishtë në Drenicë

Kryeredaktori i Gazetës “Insajderi”, Vehbi Kajtazi është sulmuar fizikisht pak çaste më parë në një lokal në qendër të Prishtinës, ndërsa Policia e Kosovës menjëherë ka arrestuar Faton Ramadanin, familjar i vëllezërve Kiçina, të dënuar me më shumë se 100 vjet për një vrasje të katërfishtë në Drenicë.

Siç ka deklaruar drejtori i gazetës, Parim Olluri, sulmi fizik ndaj Kajtazit lidhet me shkrimet që ky medium ka pasur për deputetin Milaim Zeka, i cili është mik i ngushtë i deputetit të Nismës për Kosovën.

Kryeredaktori i Gazetës Insajderi po pinte kafe në një lokal bashkë me kolegë gazetarë, kur një person i është afruar dhe e ka goditur në trup fillimisht. Dëshmitarët thanë për Express-it se sulmuesi menjëherë ka filluar ta grushtojë Kajtazin, duke i shkaktuar lëndime në fytyrë.

Vehbi Kajtazi është prej gazetarëve më të mirë në Kosovë në fushën e hulumtimit. Ditëve të fundit ai ka pasur një seri shkrimesh rreth deputetit Milaim Zeka, i cili po hetohet nga organet e drejtësisë për mashtrim me viza pune në Gjermani.

Drejtori i Gazetës Insajderi, Parim Olluri, në një prononcim për Gazetën Express, tha se sulmi ndaj Kajtazit lidhet pikërisht me këto shkrime. Alibia e Ollurit mbështetet në atë se Policia ka ndaluar pak çaste pas sulmit Faton Ramadanin, si një prej shoqëruesve të sulmuesit të Kajtazit – i cili ende nuk është kapur nga policia.

Ndryshe, Burim Ramadani, Arsim Ramadani, Arben Kiçina dhe Blerim Kiçina janë dënuar me 100 vjet burgim për vrasjen e Hamëz Hajrës në vitin 2001 dhe tre anëtarëve të familjes së tij.