Organizata terroriste “Brigada e Veriut” kërcënon me jetë Albin Kurtin

Më 29 qershor 2023 organizata “Severna brigada” është shpallur organizatë terroriste nga Qeveria e Kosovës. Ajo kishte kërcënur Kurtin edhe në vitin 2025

Kryeministri në detyrë Albin Kurti është kërcënuar sot me jetë nga organizata e shpallur terroriste “Brigada e Veriut” (“Severna brigada”).

Gjatë ditës së premte, më 08.05.2026, kjo organizatë ka publikuar në rrjetet sociale një postim kërcënues ndaj Kurtit.“Sa të lindë agimi mbi Kosovë, Albin Kurti do të jetë i vdekur”- thuhet në mesazhin drejtuar kryeministrit në detyrë.

I pyetur lidhur me këtë mesazh, kryeministri Kurti është shprehur se këto kërcënime janë dëshmi e re se është një organizatë terroriste dhe nuk ka vend në Republikën e Kosovës. “Ne i kemi shpallur ata organizatë terroriste më 29 qershor të vitit 2023 dhe këto kërcënime që i bëjnë ata janë veçse dëshmia më e re që janë ashtu siç i kemi shpallur dhe se nuk kanë vend në Republikën e Kosovës.

Të gjithë pjesëtarët e të ashtuquajturave ‘Brigadë veriore’ janë kriminelë, janë terroristë, të cilët kanë bërë zullum në Kosovë në të kaluarën, por koha e tyre në Republikën tonë ka kaluar. Fatkeqësisht, ata janë të lirë dhe vazhdojnë që të kenë ndikim në Beograd” – tha Kurti për media.

Një postim i njëjtë me mesazhe kërcënues ndaj Kurtit nga kjo organizatë është bërë në vitin 2025.

Më 29 qershor 2023 organizata “Severna brigada” është shpallur organizatë terroriste nga Qeveria e Kosovës.

---