OSBE kërkon formimin e qeverisë së re

“Fundi i ngërçit politik dhe kthimi i stabilitetit politik duhet të jetë prioriteti kryesor”, tha shefi i OSBE-së Lamberto Zannier, gjatë vizitës në Tiranë

Sekretari i Përgjithshëm i OSBE-së, Lamberto Zannier pas një takimi që zhvilloi me presidentin Gjorgje Ivanov,  tha se zgjedhjet e dhjetorit në Maqedoni sigurojnë një bazë solide për krijimin e qeverisë së re, dhe i bëri thirrje Parlamentit maqedonas që të nisë punën në përputhje me parimet demokratike dhe në pajtim me sundimin e së drejtës.

Zanier gjatë vizitës dy ditore, nuk është marrë me platformën shqiptare e cila është refuzuar nga presidenti maqedonas, nën justifikimin se është hartuar në Tiranë.

“Fundi i ngërçit politik dhe kthimi i stabilitetit politik duhet të jetë prioriteti kryesor. Zgjidhja është në duart e aktorëve politikë, të cilët duhet t’i përgjigjen sfidës dhe të zgjidhin krizën politike në dobi të qytetarëve,” u shpreh Zannier, i cili para se të marrë postin e shefit të OSBE-së, ka qenë shef i administratës ndërkombëtare (UNMIK) në Kosovë, citon TCH.

Zyrtari i lartë i OSBE-së, dënoi më tej mesazhet nxitëse dhe incidentet e kohëve të fundit, të cilat, siç tha ai, mund të çojnë drejt përkeqësimit të marrëdhënieve ndëretnike, ndërsa kujtoi se Marrëveshja e Ohrit është e një rëndësie kyçe për mbrojtjen dhe avancimin e të drejtave të komuniteteve.