OVL e UÇK-së kërkon rivlerësim të gjithë procesit për veteranët

Organizata e Veteranëve të Luftës së UÇK-së ka kërkuar rivlerësim për gjithë procesin në lidhje me veteranët.

Me anë të një komunikate për media, OVL- UÇK ka reaguar në lidhje me publikimin e disa listave që akuzohen si veteranë të rrejshëm.

“Organizata e Veteranëve të Luftës së UÇK-së nuk mund të pajtohet me publikimin nga ana e mediave të listave të veteranëve të rrejshëm‘  të hartuara nga ana e Prokurorisë Speciale të Republikës së Kosovës, e cila listë jo vetëm që është publikuar në kundërshtim me ligjin dhe etikën profesionale, por ka të evidentuar një numër shumë të madh të veteranëve të dëshmuar në luftë, të cilët janë futur në këtë listë pa kurrfarë kriteri”, thuhet në reagimin e tyre.

Sipas tyre, kjo lë të kuptohet se me rastin e ngritjes së akuzës, nuk është bërë punë profesionale, duke u anashkaluar edhe vetë ligji.

Sipas OVL- UÇK, lista e publikuar me rreth 19 mijë veteranë të rrejshëm, po dëshmon se lista përmban shumë lëshime dhe se kjo nuk mund ta çojë këtë proces deri në fund, sepse që në fillim ka komprometuar procesin, shkruan albinfo.ch.

“Prandaj, Organizata e Veteranëve të Luftës së Ushtrisë Çlirimtare të Kosovës kërkon nga Qeveria e Republikës së Kosovës që të fillojë  rivlerësimin e gjithë këtij procesi me anë të një Komisioni, i cili do të punojë në bazë të kritereve të sakta të përcaktuara me Ligjin e Veteranëve të Luftës së UÇK-së. Kjo gjë do të ishte më pak e kushtueshme dhe Prokuroria do të lirohet në punën e saj“, thuhet në reagim.

Gjithashtu OVL e UÇK-së kërkon nga Prokuroria Speciale e Kosovës që të  sqarojë opinionin se si ka ardhur deri te hartimi dhe publikimi i saj në mediat publike.

---