Parlamenti i Lucernit kundër të drejtës së votës për të huajt

Parlamenti i rekomandon popullatës që të votojë kundër të drejtës së votës për të huajt, në votimin që do të mbahet në këtë kanton

Parlamenti i kantonit të Lucernit, ka kundërshtuar mundësinë e të drejtës së votës në nivele komunash, për qytetarët me shtetësi të huaj.

Me këtë vendim, parlamenti njëkohësisht i rekomandon popullatës që të votojë kundër kësaj mundësie, në votimin popullor që do të mbahet në këtë kanton në bazë të iniciativës me moton «bashkëvendimmarrje», shkruan në portalin e televizionit publik zviceran sf.

Iniciativa është ndërmarrë nga lëvizja «Second@s plus» që përfaqëson të huajt e gjeneratës së dytë dhe nga parti e lëvizje të tjera të majta.

Iniciativa në fjalë synon që vetë komunat të kenë kompetencën për të lejuar të marrin pjesë në votimet në nivel komune edhe qytetarët me shtetësi të huaj.

Parlamenti kantonal po ashtu nuk ka pranuar që iniciativës në fjalë t`ia kundërvejë një kundërpropozim, dhe me këtë është vendosur që iniciativa, si e vetme, të hidhet për votim nga populli.