Partitë e djathta rriten në llogari të atyre të Qendrës

SVP/UDC sipas prognozës së përmendur do të ketë gjashtë deputetë më tepër se që ka sot (60 nga 54) ndërsa FDP/PLR do të rritet me edhe 4 deputetë të rinj

Në një analizë që ka publikuar dje gazeta “NZZ am Sonntag” konstatohet se në zgjedhjet nacionale që mbahen më 18 tetor 2015, partitë e djathta do të kenë një rritje të theksuar të numrit të deputetëve. Sipas studimit të institutit nga Cyrihu për hulumtimin e opinionit Sotomo, zgjedhjet që janë në prag, do të sjellin edhe një “rrëshqitje” tjetër të vendit nga e djathta.

Kështu, SVP/UDC sipas prognozës së përmendur do të ketë gjashtë deputetë më tepër se që ka sot (60 nga 54) ndërsa FDP/PLR do të rritet me edhe 4 deputetë të rinj. Rritja e partive në fjalë do të ndodhë në kurriz të GLP (Të Gjelbrit Liberalë) dhe GPS (Partia e Gjelbër e Zvicrës) të cilat do të kenë një rënie të theksuar. GPS, sipas kësaj prognoze do të ketë 5 deputetë më pak se që ka tash e GLP 4 më pak ose të dyja do të humbin nga një të tretën e forcës së tyre në parlament. Partitë e Qendrës CVP dhe BDP do të ndahen me nga një parlamentar më pak ndërsa SP/PS me 2 vende më pak në Parlamentin Nacional.

Prognozën në fjalë instituti Sotomo e ka nxjerrë duke i analizuar rezultatet zgjedhore në 26 kantonet dhe duke i kombinuar ato me trendet e regjistruara nacionale, me sondazhet regjionale dhe me lidhjet e listave të të gjitha partive.