Pas vdekjes së mjekes, Austria forcon masat kundër urrejtjes në internet

Ndërkohë mediat në Austri kanë publikuar një video te shkurtër ku shihet një grua duke shkelur dhe shqelmuar lulet e vendosura në nderim të mjekes së vdekur

Në përgjigje të vdekjes së një mjekeje të kërcënuar nga kundërshtarët e masave të koronës, gjyqësori dhe autoritetet e sigurisë së Austrisë do të pajisen më mirë për të luftuar urrejtjen në internet, transmeton albinfo.at.

Ministrja e Drejtësisë, Alma Zadic, (Të Gjelbërit) njoftoi të shtunën se do të punojë së bashku me ministrin e Brendshëm, Gerhard Karner, (ÖVP) për t’i dhënë çdo stacioni policie dhe zyrës së prokurorit publik burimet dhe mjetet e nevojshme për t’i marrë seriozisht të gjitha viktimat dhe për t’i kërkuar menjëherë autorët përgjegjës, shkruajnë mediat austriake.

“Ky hulumtim shpesh zgjat shumë, gjë që sigurisht është jashtëzakonisht stresuese për të prekurit”, tha ajo.

Mjekja Lisa-Maria Kellermayr, e cila ishte përfshirë në luftën kundër pandemisë së koronës, prej muajsh ishte e ekspozuar ndaj kërcënimeve masive me vdekje nga skena e kundërshtarëve të masave dhe për këtë arsye ishte drejtuar në polici, përcjell albinfo.ch.

Që nga vetëvrasja e mjekes 36-vjeçare rreth një javë më parë, autoritetet e Austrisë janë akuzuar se nuk janë kujdesur sa duhet për rastin.

Hetimet po zhvillohen tani edhe në Gjermani. Të premten është kontrolluar në Bavarinë e Epërme banesa e një 59-vjeçari të akuzuar për kërcënimin dhe ndjekjen e Kellermayr

Ndërkohë mediat në Austri kanë publikuar një video të shkurtër, ku shihet një grua duke shkelur dhe shqelmuar lulet e vendosura në nderim të mjekes së vdekur. Ende nuk dihet identiteti i gruas dhe as motivi i këtij veprimi të saj.

(Foto: screenshot nga viedeoja e publikuar në Bezirkszeitung.at).

---