“Pendohet” plaçkitësi i bankës

Përveç se i është vetëdorëzuar policisë, hajni ka kthyer edhe një pjesë të parave të plaçkitura

Dy javë pas plaçkitjes që ka bërë në një bankë në Moutier të kantonit të Bernës, hajni i “penduar” i është dorëzuar vullnetarisht policisë. Bëhet fjalë për një francez 48 vjeçar, i cili, pa u detyruar nga askush është paraqitur në polici dhe ka pranuar se ka qenë autor i sulmit të bërë në mesin e muajit tetor.

Ai me këtë rast edhe ka dorëzuar një pjesë të shumës së plaçkitur.

Prokuroria regjionale në një komunikatë të saj njofton më tutje se personi në fjalë dyshohet edhe për disa sulme tjera, të kryera në fillim të këtij viti, në Biel-Bienne dhe në Delemont.

Kundër tij ishte nisur një fletarrest ndërkombëtar. Kjo me siguri ia ka vështirësuar jetën në ilegalitet dhe e ka shtyrë të dorëzohet.

Policia Kantonale e Bernës po e mban në arrest personin e vetëdorëzuar.