Përvjetori i parë i masakrës në ishullin Utoya

Kjo ka qenë masakra më e tmerrshme që ka ndodhur në Norvegji që nga Lufta e Dytë Botërore

Fjalime të Kishës, vendosje kurorash, mitingje dhe koncerte janë planifikuar sot anë e mbanë Norvegjisë për të përkujtuar përvjetorin e parë të sulmeve që kanë përgjakur kombin paqësor skandinav më 22 korrik 2011. Kryeministri Jens Stoltenberg do të vizitojë ishullin Utoya ku do të mbajë një fjalim.

Atë ditë, ekstremisti i së djathtës Anders Behrung Breivik pati vrarë 77 persona , kryesisht adoleshentë (ndër të cilët edhe një vajzë kosovare), të gjithë të mbledhur në një kamp veror të organizuar nga Rinia punëtore në ishullin Utoya.

Një vit pas masakrës më të tmerrshme që ka ndodhur në Norvegji që nga Lufta e Dytë Botërore, qeveria ka organizuar një sërë aktivitetesh në Oslo, Utoeya dhe në gjithë vendin.