Petkoviq nuk fshihet: Duam fitore ndaj Brazilit

"Nuk besoj se kjo ndeshje do të dalë barazim, do të ishte një rezultat i pakënaqshëm për ne dhe rivalët tanë", deklaroi Vladimir Petkoviq

Sonte në mbrëmje do të përballen Brazili dhe Zvicra, ku amerikano-jugorët janë dukshëm favoritë në këtë ndeshje.

Megjithatë, te Zvicra nuk ka frikë, derisa trajneri Vladimir Petkoviq është shprehur se do të luajnë për fitore, shkruan albinfo.ch.

“E kemi studiuar mirë skuadrën e Brazilit, të gjithë janë kampionë. Është skuadra më e mirë e rritur ndjeshëm vitet e fundit teknikisht, një ekip i aftë për të bërë një lojë të stilit evropian”, është shprehur Petkoviq në konferencën për media.

Ai ka shtuar se nuk kanë aspak frikë. “Nuk trembemi se përballë kemi ekipin më të fortë edhe pse e respektojmë Brazilin. Por, më shumë shqetësohem se si skuadra ime do ta përballojë këtë sfidë. Do të përpiqemi të bëjmë më të mirën e mundshme përballë Brazilit. Nuk besoj se kjo ndeshje do të dalë barazim, do të ishte një rezultat i pakënaqshëm për ne dhe rivalët tanë. Ne synojmë maksimumin, pavarësisht se kë kemi përballë dhe këtu nuk jemi për të zhvilluar një miqësore”, ka theksuar Petkoviq.