Planet energjetike për Austrinë hasin në pengesë

Dimitry Anikin

Partitë opozitare të Austrisë SPÖ, FPÖ dhe NEOS, të martën, në komitetin kryesor të Këshillit Kombëtar votuan kundër ligjeve të reja të ministres Leonore Gewessler (të Gjelbërit) për të kursyer gazin, nëse Rusia vendos të ndalojë furnizimet në Austri, përcjell albinfo.at.

Kjo do të thotë vonesa për rikthimin në veprim të termocentralit Mellach me qymyr dhe gjithashtu vonesa në konvertimin e termocentraleve të ngrohjes qendrore, si ai i Wien Energy, nga gaz në naftë. Qeverisë do t’i duhej një shumicë prej dy të tretash për të miratuar legjislacionin.

Gewessler i tha ORF se uzina e Mellach mund të furnizonte 260,000 familje me energji elektrike dhe ngrohje në rast emergjence nëse shndërrohet në qymyr. “Unë e mbaj përgjegjës SPÖ-në kur shtëpitë për familjet dhe fëmijët qëndrojnë të ftohta”, tha ajo. Megjithatë, kryetari i klubit SPÖ, Jörg Leichtfried, tha se ishte e gabuar që kompanitë e energjisë që marrin miliona fitime duhet të marrin para nga tatimpaguesit.