Plazhet shqiptare me turistë edhe në tetor

Pushues të shumtë këtë të diel po marrin rreze dielli dhe po shijojnë bregdetin jonian

Fluksi i turistëve po e shoqëron bregdetin e jugut shqiptar edhe në mes të muajit tetor.

Favorizuar edhe nga temperaturat e larta në vend, qyteti i Sarandës vijon që të mirëpresë turistë, të cilët kanë zgjedhur që të shijojnë plazhet mahnitëse të qytetit.

Kryeministri shqiptar, Edi Rama, ka ndarë pamje nga bregdeti i Sarandës, ku pushues të shumtë këtë të diel po marrin rreze dielli dhe po shijojnë bregdetin jonian, transmeton albinfo.ch.

Zëvendëskryeministrja Belinda Balluku njoftoi një ditë më parë (12 tetor) se në 9-mujorin e parë të vitit 2024 në aeroportin ndërkombëtar “Nënë Tereza” u përpunuan 8 250 000 pasagjerë, ose 53.7% më shumë se një vit më parë, shkruan ATSH.

Në konferencën e organizuar në përmbylljen e sezonit turistik veror 2024, Balluku vlerësoi se flukset e turistëve ishin të paparashikueshme dhe kanë tejkakuar pritshmëritë e vendosura në fillim të vitit.

Balluku tha se parashikimet për numrin e pasagjerëve deri në fund të vitit janë 10.4 milionë pasagjerë, ndërsa shprehu bindjen se edhe kjo shifër do të tejkalohet.

---