Podujevë, vidhen 148 pasaporta kosovare

Institucioni që funksionon nën kompetencat e Ministrisë së Punëve të Brendshme është vjedhur më 21 tetor, ndërsa një person ndodhet në paraburgim prej 30 ditësh në cilësinë e të dyshuarit

Një vjedhje spektakolare ka ndodhur të shtunën e kaluar në Podujevë, 30 kilometra në veri të Prishtinë. Aty, persona tashmë të dyshuar nga Policia, kanë vjedhur 148 pasaporta të Republikës së Kosovës si dhe 3 mijë e 900 euro. Vjedhja ka ndodhur në Qendrën për Pajisje me Dokumente dhe Regjistrim të Automjeteve në këtë qytet.

Institucioni që funksionon nën kompetencat e Ministrisë së Punëve të Brendshme është vjedhur më 21 tetor, ndërsa një person ndodhet në paraburgim prej 30 ditësh në cilësinë e të dyshuarit.

“Objekti i Qendrës për Pajisje me Dokumente dhe Qendra për Regjistrim të Automjeteve në Podujevë , janë  thyer  e vjedhur të shtunën e javës që kaloi. Nga aty janë vjedhur  148 pasaporta , ndërsa në piken e shitjes se Postelekomit te Kosovës, të vendosur brenda objektit,  janë vjedhur edhe 3900 euro si dhe mbushje telefonike”, thuhet në një raport që e transmetoi RTK.

Policia e Kosovës në Podujeve ka deklaruar “se në lidhje me rastin një  person është arrestuar dhe me urdhër të prokurorit të dyshuarit i është shqiptuar masa paraburgim prej 30 ditësh”.

Ministria e Punëve të Brendshme në përgjigje të shkruar e konfirmoi vjedhjen e së shtunës, ku është marrë kasaforta me 148 pasaporta. Por, zyrtarë të kësaj ministrie deklaruan se janë marr të gjitha masat  parandaluese në rast se tentohet që pasaportat të keqpërdorën, duke u njoftuar të gjitha organet e nevojshme.

Ndërkohë, aplikuesit do të pajisen me pasaportat e tyre pa pagesë shtesë. Sigurimi i këtij objekti bëhej nga një kompani private e kontraktuar dhe nga aty është suspenduar roja i ndërrimit. Albinfo.Ch e jep të plotë lajmin që është transmetuar në televizionin publik të Kosovës.