Polakët dhe amerikanët, ‘të joshur’ nga plazhet e Shqipërisë

pamje nga Plazhi Drimadhes

Polakët dhe amerikanët kanë qenë “më të joshurit” për të vizituar Shqipërinë në vitin 2021.

Sipas raportit më të fundit të Institutit të Statistikave (INSTAT), në periudhën janar – korrik 2021, Polonia ka pasur rritjen më të madhe të hyrjeve në vend apo 5 për qind, ndërsa Shtetet e Bashkuara të Amerikës me rreth 4 për qind.

Referuar INSTAT-it, gjatë shtatë-mujorit hyrjet e polakëve në Shqipëri janë 56,198. Thënë ndryshe, 44,807 më shumë se për të njëjtën periudhë të 2020.

Ndërkaq, po këtë periudhë, shtetasit amerikanë që kanë hyrë në Shqipëri numërohen 50,980 nga 11,807 që ishte një vit më herët.

Greqia është shteti me uljen më drastike të vizitave në territor, me një rënie me afro 41 për qind. Hyrja e shtetasve grekë në vend është 85,836, pra në total 60,252 më pak se në të njëjtën periudhë të 2020.

Në një panoramë të përgjithshme, numri i shtetasve të huaj të hyrë në Shqipëri gjatë shtatë-mujorit të 2021 është 2 milionë e 846 mijë e 881, duke u rritur me 2.4 për qind në krahasim me të njëjtën periudhë të vitit 2020. /Scan TV/