Lajme

Pse Zvicra sfidon rëniet ekonomike më mirë se fqinjët e saj?

Ekonomia e Zvicrës ka qenë më e fuqishme dhe më elastike ndaj tendencave inflacioniste dhe recesionare se shumë vende të tjera. Si po arrin vendi të qëndrojë gjithmonë në krye?

Ekonomia zvicerane ka qenë gjithmonë e njohur për stabilitetin e saj, por kjo është bërë edhe më e dukshme që kur pushtimi rus i Ukrainës në shkurt 2022 ka zhytur në rrëmujë pjesën më të madhe të botës. Megjithëse Zvicra nuk i shpëtoi totalisht tendencës inflacioniste, norma e saj ka qëndruar shumë më e ulët se e vendeve të tjera: sot ajo qëndron në 2.6 për qind, krahasuar me 6.9 për qind në të gjithë eurozonën. Ekspertët ia atribuojnë këtë divergjencë disa faktorëve, duke përfshirë monedhën e fortë të Zvicrës dhe më pak varësinë nga burimet ruse të energjisë.

Por ka edhe arsye të tjera për prosperitetin e palëkundur të Zvicrës, shkruan The Local, përcjell albinfo.ch.

‘Elastike dhe e shkathët’

“Ne kalojmë nga kriza në krizë dhe gjithmonë zbulojmë se kemi bërë mirë,” tha Heike Scholten, një shkencëtare sociale që studion qëndrimin e popullsisë zvicerane ndaj ekonomisë.

“Ekonomia zvicerane është elastike dhe e shkathët.”

Fuqia e tregut të punës

Përsëri, ndryshe nga fqinjët e saj në BE, ku shkalla mesatare e papunësisë është rreth 6 për qind, ajo e Zvicrës është shumë më e ulët: 2 për qind.

“Falë shkallës së ulët të papunësisë, siguria e punës është e lartë në Zvicër,” tha ajo, duke theksuar se kur njerëzit kanë besim në tregun e punës, “ata lejojnë veten të bëjnë blerje të mëdha”.

Papunësia e ulët / dinamika e lartë e punësimit nxit prosperitetin ekonomik sepse kjo do të thotë që ndërsa njerëzit fitojnë të ardhura, ata jo vetëm që shpenzojnë më shumë (duke rritur kështu konsumin), por paguajnë edhe taksa që mbushin arkat e qeverisë.

Dhe kur kjo ndodh, të gjithë në Zvicër përfitojnë. Kantonet dhe financat e tyre përfitojnë nga fuqia e ekonomisë zvicerane, pasi qeveria federale shpërndan disa nga fitimet e saj në kantone.

Për herë të parë në 14 vjet, ata kanë postuar fitime të mëdha në llogaritë e tyre publike të vitit 2022 – të gjitha për shkak të buxhetimit të kujdesshëm, të ardhurave jashtëzakonisht të larta nga taksat dhe shpërndarjes së fitimeve të mëdha nga Banka Kombëtare, e cila u ka dhënë 4 miliardë franga kantoneve.

I gjithë ky është një lajm shumë i mirë për banorët, sepse do të thotë se asnjë shpenzim social apo shpenzim tjetër nuk do të shkurtohet – dhe shumë prej tyre do të rriten, përcjell tutje albinfo.ch.

Roli i qeverisë

Zviceranët janë të aftë financiarisht, gjë që premton mirë për ekonominë.

“Në krahasim me vendet e tjera evropiane, shteti luan një rol të moderuar në Zvicër,” tha Schulte. “Në Zvicër ekziston një vetëdije shumë e madhe se nuk mund të shpenzoni më shumë sesa fitoni.

Në fakt, sipas Organizatës për Bashkëpunim dhe Zhvillim Ekonomik (OECD), “financat publike të Zvicrës renditen ndër më të mirat për sa i përket qëndrueshmërisë”.