Qeveria premton kushte më të mira pune për xhudistët kosovarë

Kryeministri  i Kosovës, Ramush Haradinaj, ka pritur në një takim ekipin e sportistëve më të suksesshëm të Kosovës, të kryesuar nga kryetari i Federatës së Xhudos së Kosovës, Agron Kuka, trajnerin e xhudos, Driton Kuka dhe ekipin e xhudistëve, të përbërë nga Majlinda Kelmendi, Nora Gjakova, Akil Gjakova, Loriana Kuka dhe Distria Krasniqi, të cilët në emër të Qeverisë së Kosovës i ka përgëzuar për arritjet e shumta.

Haradinaj ka thënë se ata janë shembulli më i mirë për të rinjtë e tjerë se si duhet të punohet dhe të afirmohet vendi, transmeton albinfo.ch.

“Kosova ka shumë vajza e djem të suksesshëm që po na bëjnë krenarë kudo në botë. Xhudistët tanë kanë arritur kulmin me medalje botërore dhe evropiane. Ju me talentin tuaj dhe punën e palodhshme e ngritët flamurin e Kosovës në nivelet më të larta botërore të sportit dhe për këtë ju jemi mirënjohës përjetë, siç do t’i marrim përsipër edhe obligimet tona si shtet karshi juve”, kështu tha kryeministri.

Haradinaj në këtë takim u ka premtuar atyre se ekzekutivi do t’u ofrojë përkrahje të pakursyer për rregullimin e infrastrukturës ligjore e teknike dhe kushteve të punës. Ky ka qenë viti më i suksesshëm i xhudistëve të Kosovës, pasi kanë arritur 21 medalje në garat e shumta ndërkombëtare.