Qeveria Zvicerane nuk e ka ndërmend të ndryshojë qasjen ndaj Kosovës

Kështu i është përgjigjur Qeveria një postulati të deputetit të SVP-së, Jean-Pierre Graber, për ndryshimin e politikës së saj kosovare

Qeveria Zvicerane nuk ka ndërmend të ndryshojë politikën e saj ndaj Kosovës dhe, raporti i Marty-t mbi “trafikun e organeve” nuk mund ta ndryshojë qasjen e Zvicrës lidhur me Kosovën. Kështu i është përgjigjur Qeveria Federale e Zvicrës një postulati të ngritur nga deputeti i SVP-së, nga Berna, Jean-Pierre Graber, i cili kërkon nga qeveria që ajo të ndryshojë politikën e saj kosovare.

 

Njëkohësisht me përgjigjen, qeveria i rekomandon parlamentit që të refuzojë këtë postulat.

 

Qeveria e konsideron të rëndësishme që Zvicra të vazhdojë angazhimin e saj në kornizat e deritashme, thuhet më tutje në përgjigjen ndaj postulatit. Zvicra udhëheq një politikë të balancuar dhe kultivon marrëdhënie shumë të mira me të gjitha shtetet e Ballkanit, ka siguruar qeveria, në një letër që është publikuar nga portali radio Bazelit.

 

Graber në postulatin e tij ka shkruar se “Qeveria Zvicerane, në kontekstin e krimeve në Kosovë, duhet të synojë një politikë të tillë kosovare e cila do të merrte më shumë parasysh interesat e Serbisë dhe të minoritetit serb në Kosovë”. Më tutje Graber ka shkruar se “procesi që ka çuar një njohjen e kontestueshme të pavarësisë së Kosovës bazohet në një vlerësim të padrejtë dhe të njëanshëm”.

 

Nga ana tjetër ministrja e jashtme, njëherësh presidente e vendit, Micheline Calmy-Rey, që në dhjetorin e vitit të kaluar ka mbrojtur vendimin për njohje të pavarësisë së Kosovës. Sipas saj “qëllimi i këtij vendimi ka qenë stabilizimi i regjionit”.

 

Pavarësisht qëndrimit të palëkundur për njohjen e pavarësisë, Qeveria Federale e merr seriozisht raportin e deputetit Dick Marty mbi trafikun e organeve në Kosovë. Këtë qëndrim ajo e ka shprehur në përgjigje të një kërkese tjetër, të bërë nga komisioni për politikë të jashtme i Parlamentit Nacional.

 

Qeveria rithekson se ajo është për një hulumtim të rastit. Madje Ministria e Jashtme, që nga publikimi i raportit ka kërkuar nga shtetet e prekura që të hetojnë me përpikëri indikacionet që paraqiten.

 

Po kështu qeveria e sheh përgjegjës në këtë çështje edhe EULEX-in. Ajo i kërkon EULEX-it që të luajë një rol qendror në këtë problematikë, thuhet më tutje në përgjigjen e qeverisë dhënë mocionit të komisionit të përmendur parlamentar.

 

Me këtë rast Qeveria Federale nuk është kundër pranimit të mocionit, i cili e obligon atë që të angazhohet për hetimet lidhur me rastin, shkruan veç tjerash portali i Radios së Bazelit.

 

 

 

　

---