Rama: Komiteti i Ministrave duhet ta vulosë anëtarësimin e Kosovës

Kryeministri i Shqipërisë, Edi Rama, ka reaguar pas votimit në Asamblenë Parlamentare të Këshillit të Evropës për anëtarësimin e Kosovës në Këshillin e Evropës.

Rama në një postim në Facebook e quajti historik këtë votim, ndërsa bëri thirrje që në maj, në Komitetin e Ministrave, që është edhe hapi i fundit që i hap rrugë anëtarësimit, të gjithë duhet të bëjnë gjënë e duhur, vulosjen e këtij anëtarësimi, raporton albinfo.ch.

Tutje Rama tha gjithashtu se mozaikut evropian të Këshillit të Evropës i mungon një gur i pazëvendësueshëm, që është Kosova.

“Urime, urime, urime nga zemra Kosovës dhe falëminderit të gjithë miqve e partnerëve në Asamblenë Parlamentare që na mbështetën në hedhjen e këtij hapi të drejtë, i cili i dha Kosovës çka i takonte dhe i bëri nder vetë Këshillit të Evropës”, ka shkruar Rama./Albinfo.ch