Reagon opozita, kërkon veprime të matura nga Qeveria

Opozita ka reaguar për zhvillimet në veri pas daljes së Listës Serbe nga institucionet e Kosovës, duke shprehur shqetësimin për situatën.

Opozita ka reaguar për zhvillimet në veri pas daljes së Listës Serbe nga institucionet e Kosovës, duke shprehur shqetësimin për situatën.

Kryetari i PDK-së, Memli Krasniqi vlerëson se situata mund të përkeqësohet, derisa i ka bërë thirrje kryeministrit Albin Kurti që të deklarohet, raporton Albinfo.ch.

“Kërkoj nga kryeministri i Kosovës, z. Albin Kurti, që t’ju drejtohet qytetarëve për t’i njoftuar për seriozitetin e situatës dhe për hapat që do të ndërmarrin institucionet e vendit për të garantuar ruajtjen e rendit publik, jetës së qytetarëve dhe sovranitetit të vendit”, është shprehur Krasniqi.

“Situata është duke ndryshuar nga ora në orë dhe rreziku i përshkallëzimit është evident. Kjo duhet të shmanget dhe qëllimi duhet të jetë ruajtja e paqes dhe sigurisë”, ka thënë ai.

Edhe kryetari i LDK-së, Lumir Abdixhiku ka thënë se në kohën e zhvillimeve të fundit në veri të vendit, Kosovës i duhet udhëheqje e matur që nuk bjen në grackat destabilizuese të Serbisë, por që synim ka integrimin e vazhdueshëm e të plotë të serbëve të Kosovës e që mjet të domosdoshëm ka koordinimin e ngushtë me aleatë ndërkombëtarë.

“Politikat populliste, me synim turmat partiake para interesave madhore nacionale, i sjellin Kosovës dëme afatgjate dhe regres në arenën ndërkombëtare.

LDK-ja i fton qytetarët në veri për qetësi; ndërsa institucionet e Republikës për koordinim të ngushtë me ShBA-të dhe aleatët tjerë evropianë”, ka thënë ai.

Tutje, siç njofton LDK në një komunikatë, Abdixhiku ka thënë se moskoordinimi me aleatët ndërkombëtarë nga institucionet e Republikës së Kosovës, i nxitë dhe shërben agjendat destabilizuese e provokuese në territorin e Kosovës. “Pasojat e një destabilizimi të tillë janë të pariparueshme për vendin”, thuhet në komunikatë./Albinfo.ch/

---