Uncategorized

Rezultatet zyrtare: Visar Ganiu fiton në Çair

(E plotësuar): Tashmë janë shpallur edhe rezultatet zyrtare, ku Visar Ganiu është shpallur fitues në Çair.

Këshilli Zgjedhor në vendvotimin 2901 në Çair, jozyrtarisht ka shpallur rezultatet e para të votimit.

Gjatë rivotimit të sotëm Visar Ganiu i BDI-së ka marrë gjithsej 169 vota, kurse Zeqirja Ibrahimi i Lëvizjes Besa ka marrë vetëm 98 vota, nga gjithsej 272 vota të hedhura sot në kutinë e votimit, raporton “Alsat”.

Në këtë vendvotimin ishin gjithsej të regjistruar 719 votues dhe në raundin e dytë të zgjedhjeve, ato të datës 29 tetor, në këtë vendvotim kanë votuar 278 persona. Për kandidatin e Lëvizjes Besa, Zeqirija Ibrahimi kishin votuar 164 persona, ndërkohë që për kandidatin e BDI-së, Visar Ganiu kishin votuar 98 persona, përcjell albinfo.ch.

Humbjen, si duket e ka pranuar edhe kandidati i Lëvizjes Besa, Zeqirja Ibrahimi. “Dua t’ia uroj LSDM-së fitoren në Komunën e Çairit. Kjo është fitore e vjedhur dhe nëse ata e pranojnë si të tillë ne ua urojmë. I falënderoj qytetarët që morën guximin të votojnë përkundër shumë presioneve dhe zhvatjeve. Më vjen keq për ata qytetarë që sot u burgosën me burg shtëpiak nga vagabondët e partive në pushtet dhe nga zyrtarë të policisë që abuzuan vendet e tyre zyrtare dhe nuk i lejuan qytetarët të dalin të votojnë”, deklaroi Ibrahimi.