Roth: Zgjidhja e kontestit të emrit sinjal pozitiv për gjeneratat e ardhshme

“Bëhet fjalë për pajtim të gjeneratave të ardhshme në rajon, në të cilin ende janë të pranishme plagët e luftërave”, tha Roth.

Sekretari shtetëror në Ministrinë e Punëve të Jashtme të Gjermanisë, Michael Roth, ka deklaruar se marrëveshja historike mes Maqedonisë dhe Greqisë për çështjen e emrit dëshmoi se është e mundshme që të tejkalohen edhe dallimet e mëdha bilaterale, nëse rritet besueshmëria dhe ekziston vullnet politik, shkruan albinfo.ch.

Ai në kumtesë, përpara pjesëmarrjes në takimin e shefave të diplomacisë së Samitit BE – Ballkani Perëndimor në korniza të procesit të Berlinit në Londër, ka theksuar se stabiliteti i zhvillimit demokratik të vendeve në rajon është në interes, si për Gjermaninë, ashtu për Europën, por edhe se është e rëndësisë së veçantë për vetë sigurinë.

“Mbledhja është mundësi për vendet e rajonit që ta përmirësojnë bashkëpunimin rajonal dhe me atë ta nxisin afrimin e tyre në BE”, theksoi Roth.

Gjithashtu ai shtoi se me qëllim të rritjes së besueshmërisë, jo vetëm në mes politikanëve, por edhe qytetarëve, qeveria e Gjermanisë e përkrah punën e komunitetit rajonal rinor në korniza të procesit të Berlinit.

“Bëhet fjalë për pajtim të gjeneratave të ardhshme në rajon, në të cilin ende janë të pranishme plagët e luftërave”, tha Roth.

Tashmë Maqedonia pritet të marrë datë për anëtarësim në NATO, vetëm pak javë pasi mori rekomandimin për hapjen e negociatave me BE.