Rripi i Gazës – vendi më i rrezikshëm në botë për fëmijët, sipas UNICEF

Keystone (AP Photo/Fatima Shbair)

Agjencia e Organizatës së Kombeve të Bashkuara për fëmijët po bën thirrje për armëpushim të qëndrueshëm humanitar mes Izraelit dhe Hamasit, teksa UNICEF-i ka bërë thirrje për ndalimin e menjëhershëm të armiqësive në enklavën palestineze të shkatërruar nga lufta.

“Duhet të zbatohet një armëpushim afatgjatë. Alternativa është e paimagjinueshme për njerëzit që, siç më tha një palestinez, tashmë jetojnë në një makth. Mosveprimi, në thelb, është miratimi i vrasjes së fëmijëve. Por, ja ku jemi. Bombat filluan vetëm pak sekonda pas armëpushimit”, ka thënë zëdhënësi i UNICEF-it, James Elder, përcjell Euronews.

Sipas të dhënave nga autoritetet shëndetësore të Gazës, Organizata Botërore e Shëndetësisë ka thënë se më shumë se 15 mijë njerëz kishin vdekur që nga 27 nëntori, numër nga i cili 41 për qind – ose 6.150 – ishin fëmijë, përcjell albinfo.ch.

Këto të dhëna u përditësuan sot, sipas të cilave kjo shifër ka shkuar në më shumë se 15.200, 70 për qind e tyre gra dhe fëmijë.

“Është thellësisht shqetësuese të dëgjosh se si disa kanë qenë në gjendje të anashkalojnë vdekjet tragjike të mijëra e mijëra djemve dhe vajzave në Gaza dhe tani me sa duket janë të kënaqur me tmerret, sulmet duke filluar përsëri. Të pranosh sakrificën e fëmijëve në Gaza është heqja dorë nga njerëzimi”, ka thënë Elder.

OBSH raportoi se 18 nga 36 spitale janë pjesërisht funksionale dhe kapaciteti total i shtretërve në Gaza ka rënë nga 3.500 në vetëm 1.562. Duke pasur parasysh nevojat ekstreme, aktualisht kërkohen të paktën 5000 shtretër.

“Sistemi shëndetësor i Gazës është gjymtuar nga armiqësitë e vazhdueshme dhe dua të theksoj se nuk mund të përballojë të humbasë më spitale apo shtretër spitalesh. Ne jemi jashtëzakonisht të shqetësuar për rifillimin e dhunës që mund të ketë dëmtuar ose shkatërruar objektet shëndetësore, siç ndodhi në veri”, ka thënë Richard Peeperkorn, përfaqësues i OBSH-së në territoret e pushtuara palestineze.