Rritja më e madhe e ekonomisë gjermane në gjashtë vjetët e fundit

Prodhimi industrial gjerman u rrit më shumë se sa pritej në gusht. Kjo është norma më e lartë e rritjes në gjashtë vjetët e fundit, sipas të dhënave të lëshuara të hënën, raporton Reuters, përcjell albinfo.ch.

Ekonomia më e madhe e Evropës po rritet vazhdimisht në tremujorin e tretë të këtij viti. Prodhimi industrial në muajin gusht u rrit me 2.6 për qind. Ky është rezultati më i mirë që nga korriku i vitit 2011 dhe ai tejkaloi vlerësimet e optimistëve më të mëdhenj.

“Ky është një rezultat shumë i mirë”, thotë Ralf Solven, ekonomisti kryesor në “Commerzbank”. Ai pret që deri në fund të këtij viti kjo rritje të jetë më e ulët, por është e qartë se ekonomia gjermane është më e qëndrueshme se kurrë.

Prodhimi i veturave, sipas të dhënave të Ministrisë Gjermane të Ekonomisë, është lideri i rritjes ekonomike dhe më së shumti kontribuon në rezultatin e përgjithshëm pozitiv në vend.