Rritje e lehtë e shkallës së papunësisë

Në fund të muajit nëntor ishin 136.552 veta të papunë. Krahasuar me muajin e njëjtë të një viti më parë bëhej fjalë për 2521 më pak të papunë

Shkalla e papunësisë në Zvicër gjatë muajit nëntor ka shënuar një ngritje të vogël. Nga 3.1 për qind sa ka qenë në tetor, ajo në muajin e kaluar është ngjitur në 3.2 për qind, njofton Sekretariati Shtetëror i Ekonomisë (Seco).

Në fund të muajit nëntor në Zvicër numëroheshin saktësisht 136.552 veta që ishin të regjistruar si të papunë. Krahasuar me muajin e njëjtë të një viti më parë bëhej fjalë për 2521 më pak të papunë.

Kjo ngritje e vogë e skallës së papunësisë është e zakonshme për këtë periudhë të vitit dhe ka shkaqe sezonale, shkrun nzz.ch. Kështu, papunësia në hotelieri gjatë nëntorit ka qenë 9.7 % ndërsa në ndërtimtari 5.5%.

Zakonisht, përqindja e të papunëve në mesin e më të rinjve (kategoria 15 deri 24 vjeç) është më e lartë se në mesin e moshave të tjera. Por, në nëntorin që kaloi, në Zvicër janë regjistruar më pak të papunë të kësaj kategorie, si në krahasim me dy muajt paraprakë ashtu dhe me muajin e njëjtë të një viti më parë.

Kështu, në muajin shtator të këtij viti, listat e të papunëve të moshave të reja ishin shkarkuar për 3100 persona. Këta pra kishin humbur të drejtën për të marrë kompensimin nga fondi i të papunëve.