Rritje rekorde e shkurorëzimeve në Shqipëri

Ka një rritje rekord të divorceve në Shqipëri. Sipas të dhënave të publikuara, rezulton se 26.1% e martesave përfundojnë në divorc. Sociologu Gëzim Tushe ka shpjeguar në A2 disa nga arsyet që çojnë në divorc çiftet shqiptare. Sipas tij, ka një tërësi faktorësh që çojnë në divorc si; papjekuria, emigracioni, ekonomia, arsimimi si edhe faktorë të tjerë që kanë të bëjnë me kulturën e martesës dhe divorcit.

“Divorci është tronditje sizmike e shoqërisë. Koha moderne e liberalizoi lidhjen martesore dhe të drejtën e njeriut për të hyrë dhe dalë nga martesa. Shumë lidhje martesore po bëhen  me mendjelehtësi. Shumë njerëz martohen pa u menduar gjatë. Edhe gratë kanë dalë nga biologjia e tyre, koncepti ynë për gruan është rudimental. Është një tërësi faktorësh që ndikojnë te divorci që kanë të bëjnë me kulturën e martesës dhe divorcit. Shumë divorce i bëjmë pa u menduar gjatë. Ne kemi presion të tmerrshëm të opinionit publik. Janë disa komponentë që e mbajnë gjallë martesën dhe distancimi krijon probleme dhe sjell kriza. Në distancë krijohen problem që kanë të bëjnë me ekzistencën e martesës”, përcjell Albinfo.ch.

Për Tushen, kur martesa kthehet në burg shtëpiak është mirë që të prishet, por rritja e divorceve thekson ai krijon probleme për shoqërinë. Sipas tij, divorci ka lidhje me mirëqenien.

“Martesa kur kthehet në burg shtëpiak është mirë të prishet. Por rritja e divorceve është bërë kazmë e madhe ka pasoja individuale dhe pasoja për shoqërinë shqiptare që ka probleme të mëdha sociale. 26% e divorcit lidhet me nivelin e mirëqenies. Mbeten fëmijët jetimë socialë, këta fëmijë quhen trofe, dhe prapë është e vërtetuar që më mirë të kesh një baba të vdekur se një të divorcuar. Familjet bien në varfëri, të moshuarit pësojnë trauma”.

Ai i sugjeron të rinjve që kur marrin vendimin për martesë të mendohen gjatë, se martesa nuk është parajsa e seksualitetit, ajo ka dialektikën e brendshme. Sipas tij, ata duhet të bëjnë diagnostikime më të holla që lidhen me elementet romantike e erotike.

“Kur marrin vendimin për t’u lidhur me njeri duhet të mendojë gjatë se martesa nuk është vetëm seksualiteti, martesa ka dialektikën e brendshme. Një njeri që ka prirje poligame ai nuk reziston që të qëndrojë në martesë. Martesa tradicionale dhe viktoriane ka pasur si bazë faktorin ekonomik që e mbante të lidhur edhe kur tronditej nga brenda. Gratë e sotme janë më shumë të punësuara dhe në karrierë, kurse sot martesa është lidhje erotike dhe emocionale. Duhet të bëjnë diagnostikime më të holla që lidhen me elementet romantike e erotike, se këta janë shumë të rëndësishme dhe niveli arsimor është shumë i rëndësishëm. Duhet kod marrëveshjeje për të mbajtur përgjegjësitë që kanë të bëjnë me martesën”.