Rrjeti i Bizneseve Shqiptare organizon “Diaspora Business Connection” , bëhen bashkë qindra biznese

Të shtunën, më 21 tetor 2023, në Cyrih Rrjeti i Bizneseve të Diasporës Shqiptare në Zvicër (RRBDSHZ) ka bërë bashkë qindra afariste dhe afaristë shqiptarë në eventin “Diaspora Business Connection”. Në këtë takim, të dytin me radhë të Bizneseve Shqiptare në Zvicër, ishin të pranishëm tre ambasadorët e tri ambasadave: të Kosovës, Shqipërisë dhe Maqedonisë së Veriut.

Tre diplomatët shqiptarë, Sami Ukelli, Ambasadori i Shqipërisë, Mustafa Nano dhe ambasadori i Republikës së Maqedonisë së Veriut, Rexhep Demiri. kanë përshëndetur afaristet dhe afaristët shqiptarë të Zvicrës të mbledhur në këtë takim në Cyrih, duke ofruar mbështetjen e tyre për Rrjetin e Bizneseve Shqiptare për bashkimin dhe organizim në forma të tilla të bashkëpunimit, të cilat do të jenë në dobi të komuniteti tonë në Zvicër, e të cilat do të mund të ndihmonin që edhe Kosova, Shqipëria dhe Maqedonia e Veriut të përfitojnë.

 

Presidenti i Bordit të RRBDSHZ-së, Fehmi Fetahi, përshëndeti të pranishmit dhe prezantoi rrjetin, ku paraqiti një raport të shkurtër të aktiviteteve.

Organizata, sipas afaristit Fetahu ka pasur rëniet dhe ngritjet gjatë këtyre viteve, por tani ajo është në fazën e rrjetëzimin më të madh të bizneseve të diasporës shqiptare në Zvicër, dhe kjo dëshmon më së miri edhe sot me praninë tuaj të madhe në këtë takim, tha Fetahi.

Fetahi, biznesmen shumë i suksesshëm në Kosovë dhe Zvicër, ka përmendur bashkëpunimet e shumta të bizneseve që vijnë si rezultat i anëtarësimit në Rrjetin e Bizneseve të Diasporës Shqiptare në Zvicër. Po ashtu janë listuar edhe investimet nga bizneset shqiptare nga Zvicra në Kosovë.

Ndërsa nënkryetari i Rrjetit të Bizneseve Shqiptare, Rexhep Berisha, tha se ky organizim ekonomik ka arritur të bëjë bashkë bizneset nga të gjitha vendet e origjinës: Kosovë, Shqipëri, Maqedoni e Veriut dhe Lugina e Preshevës.

“Rrjeti tashmë ka shtrirje në gjithë Zvicrën, përfshirë edhe kantonin italishtfolës, Ticinon”, tha Berisha.

Në këtë takim të moderuar nga juristi i Rrjetit, Nazmi Jakurti, janë ndarë edhe mirënjohje për disa aktiviste, mes tjerash ish-kryetaren e Rrjetit, zonjën Merita Pinta. Ajo, si grua afariste e suksesshme ka udhëhequr për një vit këtë organizatë ekonomike për herë të parë në historinë e Rrjetit që nga viti 2013.

Po ashtu me mirënjohje është nderuar edhe Fatime Berisha-Imeri, një mjeke dhe afariste e suksesshme, bashkëpronare dhe CEO e disa laboratorëve dhe klinikave mjekësore në Zvicër.

Një mirënjohje i është ndarë edhe zonjës Lirije Veselaj, e cila është prej fillimit pjesë e rëndësishme e Rrjetit të Bizneseve të Diasporës Shqiptare.

Krejt në fund në një apero, ndërmarrësit shqiptarë nga Zvicra kanë shkëmbyer përvojat e tyre duke lidhur kontrata bashkëpunimi.

Rrjeti i Bizneseve Shqiptare në Zvicër është themeluar në vitin 2013, si organizatë e parë e pavarur jopolitike dhe jofitimprurëse, si urë lidhës e bizneseve të diasporës me vendlindjen.

Foto tjera nga fotografja Fiona Murtaj: FOTO

 

---