Rumania, Bullgaria dhe Kroacia afër përdorimit të euros

Rasti më i fundit është Rumania, shkruan Bloomberg, e cila tha javën e kaluar se do të paraqesë strategjinë e saj deri në fund të vitit, duke rindezur kështu një ide që u mbyll në vitin 2015

Tre shtetet më të varfra të Bashkimit Evropian, tani kanë marrë miratimin e eurozonës, pas përpjekjesh të gjata për të përmbushur kushtet e nevojshme, për të përdorur monedhën e përbashkët euro.

Rasti më i fundit është Rumania, shkruan Bloomberg, e cila tha javën e kaluar se do të paraqesë strategjinë e saj deri në fund të vitit, duke rindezur kështu një ide që u mbyll në vitin 2015, shkruan ‘Monitor’.

Kjo nismë, bashkohet me Bullgarinë dhe Kroacinë, me qëllim kërkimin e një rrugë për t’u bashkuar me eurozonën. Ekspertët shkruajnë se kjo mund të ndihmojë vendet e Ballkanit të qëndrojnë pranë BE-së, meqë lindin pyetje për mënyrën se si do të shpërndahen më vonë fondet e rëndësishme të zhvillimit, përcjell albinfo.ch.

Planet e tre vendeve bien në kontrast me shtetet më të pasura të Evropës Lindore ish-komuniste. Ndërsa Sllovenia, Sllovakia dhe vendet Baltike të Estonisë, Letonisë dhe Lituanisë përdorin të gjithë euron si monedhë të përbashkët; Polonia, Republika Çeke dhe Hungaria nuk kanë plane për të ndjekur këtë shembull.

Përvoja e Greqisë se çfarë mund të ndodhë kur politika monetare e pavarur nuk funksiononte më, nuk ka ndihmuar. Por, kur për anëtarët më pak të pasur të BE-së, fondet e zhvillimit mund të jenë të nevojshme për vitet që vijnë, atëherë përdorimi i euros do t’i ndihmojë të kapërcejnë hendekun e pasurisë.