Rusia i kërkon Shqipërisë ekstradimin e spiunëve të ndaluar në uzinën e armëve

Autoritetet ruse kërkojnë ekstradimin e Svetlana Timofoeva, e arrestuar në vendin tonë pas sulmit të ndodhur në uzinën e armëve në Gramsh.

Nga shteti rus ka mbërritur një kërkesë fillimisht në Ministrinë e Drejtësisë, e më pas në Prokurorinë e Elbasanit, ku kërkohet që kjo shtetase të ekstradohet në Rusi, pavarësisht se në Shqipëri ka një hetim ndaj saj.

Kjo kërkesë pritet të shqyrtohet nga Gjykata e Elbasanit për të vendosur ekstradimin ose jo të saj. Rusja Svetlana Timofoeva mbahet në burg që nga data 20 gusht e këtij viti.

Dy rusët, Svetlatana Timofoeva, Mikhail Zorin dhe ukrahinasi Fiodor Mihailoviç, u arrestuan më 20 gusht, kur ndodhi edhe incidenti në uzinë.

Tre personat po fotografonin ambientet e uzinës, ndërsa përpiqeshin të hynin brenda saj, u pikasën nga ushtarët shqiptarë që u kërkuan që të ndalonin.

Mikhail Zorin sulmoi ushtarin duke e spërkatur me një sprej të dyshuar kimik. 3 personat u arrestuan dhe ndërkohë u sekuestrua makina me të cilën lëviznin.

Tashmë mbi ta rëndon zyrtarisht akuza e “Dhënia e informatave sekrete”, dhe “Sigurimi i informatave”. Gjykata ka vendosur ndaj tyre masën e sigurisë “arrest me burg”./euronews