Sfidat për skuadrat shqiptare

Partizani të mërkurën ka luajtur në kualifikimet për Ligën e Kampionëve, derisa të enjten luajnë Kukësi dhe Shkëndija

Nënkampioni i Shqipërisë, Partizani të mërkurën barazoi me Ferencvarosin e Hungarisë, 1:1, shkruan albinfo.ch.

Skuadra shqiptare kaloi në epërsi në minutën e 47-të me anë të futbollistit Fili, megjithatë hungarezët barazuan në minutën e 71-të. Ndeshja e kthimit do të zhvillohet pas një javësh. Në këtë garë është dashur që të paraqitet Skënderbeu, megjithatë, u dënua për shkak të kurdisjeve së rezultateve.

Të enjten do të luajnë edhe dy skuadrat tjera shqiptare, por në Ligën e Evropës. Kukësi në kryeqytetin austriak, përballë një rivali me emër, ndërsa Shkëndija e Tetovës në kryeqytetin e Azerbajxhanit, për të shkruar një tjetër faqe të artë të historisë në arenën ndërkombëtare.

Kukësi synon të përsërisë arritjet e jashtëzakonshme të edicioneve 2013-14 dhe 2015-16. Shkalla e vështirësisë është e lart, por te Kukësi kanë besim se asgjë nuk është e pamundur. Edhe pse Austria e Vjenës është një skuadër me traditë të lavdishme, ku numëron 24 tituj kampion të Bundesligës dhe 27 Kupa të Austrisë, në radhët e skuadrës shqiptare janë optimistë.

Kjo ndoshta lidhet me faktin që, pavarësisht se kushton mbi 18 milionë euro dhe ka në stol një emër si Thorsten Fink , në vitet e fundit skuadra vjeneze e ka humbur shkëlqimin në Evropë, ku në dy sezonet e kaluara mbeti jashtë futbollit të madh kontinental.

Shanset e saj kërkon ti luajë edhe Shkëndija. Skuadra tetovare do të kërkojë të përsëritë ndaj Neftçi Bakusë mrekullinë e realizuar në turin e parë përballë Cracovias. Në të gjitha rastet e tjera, azerët do të cilësoheshin favoritë të padiskutueshëm. Por, suksesi i jashtëzakonshëm i Shkëndijës përballë polakëve, ndryshoi balancat. Fakti që kuqezinjtë japin garanci në mbrojtje dhe janë shfaqur të frikshëm në sulm, kanë ndikuar që shanset e tyre për t’u kualifikuar të rriten.

Pasi shkroi historinë, duke kaluar një tur në Ligën e Evropës, Shkëndija është gati të vazhdojë ëndrrën drejt një tjetër rezultati historik.