Shaqiri dëshiron të fitojë Ligën e Kampionëve me Liverpoolin

Xherdan Shaqiri shpreson se do të fitojë sërish trofeun e çmuar me Liverpoolin

Futbollisti shqiptar, Xherdan Shaqiri bëri një hap të madh në karrierën e tij kur këtë verë kaloi nga Stoke City në Liverpool.

Ai kaloi te nënkampionët e Evropës për 15 milionë euro. Shaqiri më herët ka fituar Ligën e Kampionëve me Bayernin, derisa tani shpreson se do ta fitojë edhe me skuadrën e madhe angleze, përcjell albinfo.ch.

“Shpresoj se do të mund ta fitoj përsëri, sepse e di si ndihet një fitues i Ligës së Kampionëve. Do të ishte e mahnitshme nëse mund ta fitojmë. Kemi futbollistë mjaft cilësorë”, është shprehur Shaqiri për mediat angleze, pasi iu bashkua ekipit në SHBA.

Shaqiri ka shtuar se shpreson që do të fitojnë trofe në “Anfield” dhe kjo është më e rëndësishmja.

Mesfushori shqiptar ka treguar edhe pse iu bashkua Liverpoolit. “Kur kam dëgjuar se Liverpooli po më kërkonte, dëshiroja të vija menjëherë, pasi e kam njohur edhe trajnerin Jurgen Klopp. Atë e kam admiruar për një kohë të gjatë dhe jam shumë i lumtur që jam këtu. Ai është një person i madh me një karakter dhe mentalitet fitues”, shtoi tutje Shaqiri.