SHBA, 850 miliardë dollarë ndihmë për ekonominë

Qeveria amerikane ka ndërmarrë një sërë masash nxitëse të guximshme për të shëruar ekonominë e sëmurë nga shpërthimi i koronavirusit

Sekretari i Thesarit, Steven Mnuchin tha se Presidenti Donald Trump ka autorizuar shtyrjen e 300 miliardë dollarëve në pagesa tek IRS (shërbimi i të ardhurave të Shteteve të Bashkuara). Mnuchin tha se nëse individët  detyrohen një pagesë, ata mund të shtyjnë deri në 1 milion dollarë, dhe korporatat mund të shtyjnë deri në 10 milion dollarë. Shtyrjet do të jenë pa gjoba për 90 ditë pasi SH.B.A-ja po përpiqet të përballojë krizën e koronavirusit, transmeton Monitor.

Një tjetër masë e propozuar sipas mediave të huaja, është dërgimi i çeqeve tek amerikanët brenda dy javësh, si pjesë e një pakete të re nxitëse që synon të kufizojë dëmet që po i shkaktohen ekonomisë nga shpërthimi i koronavirusit, përcjell albinfo.ch.

Paketa nxitëse pritet të arrijë në 850 miliardë dollarë për të mbështetur ekonominë.

Paketa do të përfshijë 50 miliardë dollarë për linjat ajrore, të goditura rëndë nga pandemia dhe 250 miliardë dollarë për kredi për biznesin e vogël.

Trump tha se administrata e tij po merrte në konsideratë nëse do të dërgonte çeqe për individët amerikanë me vlerë  prej 1.000 dollarë për t’i ndihmuar ata të përballeshin me  krizën, megjithëse ai tha se detajet po përpunoheshin.

Kjo lëvizje shënon një kalim të Shtëpisë së Bardhë drejt një reagimi më agresiv të politikës ekonomike, pasi shpërthimi i sëmundjes ka detyruar mbylljen e shkollave, bareve, restoranteve dhe ndërmarrjeve prodhuese në të gjithë vendin. Ajo gjithashtu ka çuar në një rënie të mprehtë të biznesit në sektorë që fillojnë nga linjat ajrore deri tek mikpritja.

“Do të jetë e madhe dhe do të jetë e guximshme”, u tha Donald Trump, presidenti amerikan, gazetarëve në një konferencë të Shtëpisë së Bardhë të martën, duke iu referuar paketës së stimulit. Ai tha se kishte “entuziazëm” në Capitol Hill për masat.

Administrata Trump ka propozuar gjithashtu uljen e taksave të pagave, të cilat financojnë pensionet qeveritare dhe programet e kujdesit shëndetësor, dhe stimulimin për sektorët e goditur të ekonomisë, nga bizneset e vogla te linjat ajrore amerikane. Demokratët po bëjnë ndërkohë presion për masa më të përshtatshme për familjet me të ardhura të ulëta, të tilla si ndihma e papunësisë, ndihma ushqimore dhe shtyrja e kredisë.

---