Shfaqja e filmit “Bukuria e Gomarit” e regjisores Dea Gjinovci në Bernë

Një rrëfim emocionues mbi kujtimet dhe reziliencën e komunitetit kosovar, në kuadër të Javës së Gjuhës Frënge dhe Frankofonisë

Me rastin e Javës së Gjuhës Frënge dhe Frankofonisë (SLFF), Ambasada e Republikës së Kosovës në Zvicër, me mbështetjen e Ministrisë së Punëve të Jashtme të Zvicrës, ka kënaqësinë të ftojë publikun në shfaqjen e filmit të regjisores zvicerano-kosovare Dea Gjinovci, “Bukuria e Gomarit” (La Beauté de l’Âne), shkruan albinfo.ch.

Vlen të theksohet se filmi do të shfaqet të hënën, më 30 mars, në orën 18:00, në CineClub Quinnie, Laupenstrasse 17, Bernë. Hyrja është falas, por kërkohet regjistrim i detyrueshëm përmes formularit: Regjistrohu këtu. Pas shfaqjes, do të shërbehet një aperitiv për të gjithë pjesëmarrësit.

Për më shumë informacione mbi filmin, mund të vizitoni: SLFF – La Beauté de l’Âne – Këtu

Përshkrimi i filmit:

Në këtë film të tipit fiction-documentaire, me një kohëzgjatje prej 77 minutash dhe në gjuhën frënge, regjisorja Dea Gjinovci dhe babai i saj, i cili jeton në Gjenevë në mërgim për gjashtëdhjetë vjet, kthehen në fshatin e tyre të lindjes, Makermal në Kosovë.

Fshati u shkatërrua gjatë luftës, dhe ajo që ka mbetur janë tregimet e banorëve që ende jetojnë. Është një komunitet rezilient, ashtu si historia e tyre. Në këtë dokumentar-fiktion emocional, kineastja nis një kërkim për gjurmët e së kaluarës së saj, së bashku me babanë dhe anëtarët e komunitetit. Ata ringjallin kujtimet e fëmijërisë së babait të saj në Kosovën e viteve 1950, zbulojnë fakte tronditëse, rikujtojnë jetën e përditshme, por shumë pyetje mbeten ende pa përgjigje.

Ky film ofron një udhëtim të thellë emocional në kujtesën dhe identitetin e një komuniteti që nuk dorëzohet, duke përzier artin e kinemasë me dokumentarin dhe rrëfimin personal. /Albinfo.ch

---