Shkon mbi 20 mijë numri i të vdekurve nga koronavirusi në Spanjë

Ministria e Shëndetësisë e Spanjës ka njoftuar se 585 persona kanë vdekur nga koronavirusi gjatë 24 orëve të fundit.

Kështu, numri i përgjithshëm i viktimave shkoi në 20,043, duke e bërë Spanjën vendin e tretë në botë që e kalon shifrën prej 20 mijë të vdekurve pas Shteteve të Bashkuara dhe Italisë.

Përpos viktimave, u shënuan edhe mijëra raste të reja të infektimeve. Nga 188,068 sa ishte shifra e të prekurve një ditë më parë, ajo shkoi në 191,726 të shtunën.

Qeveria spanjolle nga kjo javë ka vendosur t’i largojë disa masa të kufizimeve, me qëllim të riaktivizimit të sektorëve të ekonomisë.

Nga e hëna punën kanë mundur ta fillojnë punëtorët e ndërtimtarisë dhe të fabrikave, por shumica e popullsisë mbetet nën masa të izolimit.

Edhe disa vende të tjera evropiane kanë filluar t’i lehtësojnë masat e izolimit. Italia dhe Austria kanë filluar t’i hapin dyqanet, ndërsa në Danimarkë ka rifilluar procesi mësimor në shkollat fillore.

---