Shoqëria “Teuta Lausanne” shënon 20-vjetorin e themelimit dhe 113-vjetorin e Pavarësisë së Shqipërisë

20 vjet “Teuta Lausanne” mbrëmje shqiptare në Renens

Në një mbrëmje festive që pritet të mbledhë bashkë shqiptarë nga mbarë Zvicra, Shoqëria Kulturore “Teuta Lausanne” do të shënojë 20-vjetorin e aktivitetit të saj si dhe 113-vjetorin e Pavarësisë së Shqipërisë, transmeton albinfo.ch.

Ngjarja do të mbahet më 22 nëntor 2025, duke filluar nga ora 19:00, në Salle de spectacle de Renens, ku pritet të përsëritet atmosfera e ngrohtë që kjo shoqëri ka krijuar ndër vite me vallëzime, tradita dhe miqësi që ruajnë gjallë rrënjët shqiptare në mërgatë.

Nën moton “Dy dekada vallëzimi, traditash dhe miqësie që na bashkojnë rreth rrënjëve tona”, mbrëmja do të jetë një kombinim i artit, kulturës dhe krenarisë kombëtare.

Shoqëria “Teuta Lausanne”, përmes aktivitetit të saj të pandërprerë për dy dekada, ka kontribuar në ruajtjen e vlerave shqiptare dhe në prezantimin e kulturës në Zvicër, duke u bërë një urë e fortë lidhëse ndërmjet brezave dhe traditave./Albinfo.ch

---