Shpëtim nga katastrofa në çastin e fundit

Aksidenti për pak është shkaktuar nga problemet në komunikim në mes të personelit drejtues të aeroportit

Dy aeroplanë udhëtarësh për pak i kanë shpëtuar një katastrofe ajrore, në veri të aeroportit të Klotenit, në Cyrih, në qershor të vitit 2009. Ky lajm është bërë i njohur sot nga një raport që ka publikuar Byroja për hulumtimin e aksidenteve ajrore dhe ka zënë vend të theksuar në të gjitha mediet e Zvicrës.

Aksidenti i evituar në momentin e fundit dhe nga i cili mrekullisht kanë shpëtuar udhëtarët e dy aeroplanëve, është shkaktuar nga problemet në komunikim. Një drejtuese fluturimesh, e cila ishte duke bërë kualifikimin profesional, nuk kishte mundur të merrej vesh me trajnuesin e saj.

Dy aeroplanët që i shpëtuan aksidentit ishin një Airbus i kompanisë Air France dhe një Boeing nga Ryanair. Ata, në momentin kritik kishin një distancë vertikale mes vete prej vetëm 221 metrash.