Shqipëri: Pandemia ndikoi në rënien e shitjeve

Në vitin 2020 ndërmarrjet në aktivitetet e prodhimit të të mirave dhe shërbimeve realizuan 2.147 miliardë lekë shitje neto, duke shënuar një rënie me 5,1 %, krahasuar me vitin 2019.

INSTAT publikoi sot rezultatet paraprake të Anketës Strukturore të Ndërmarrjeve për vitin 2020.

Mbyllja e bizneseve si dhe kufizimi i lëvizjeve për shkak të pandemisë së shkaktuar nga pandemia e COVID-19 ishte shkaku kryesor i rënies së aktivitetit përgjatë vitit 2020.

Referuar INSTAT, në vitin 2020 ushtruan aktivitetin e tyre 102.564 ndërmarrje aktive, duke u ulur me 1,5 %, krahasuar me vitin 2019, ndërsa numri gjithsej i të punësuarve u ul me 5,2 %.

Bazuar në rezultatet paraprake të Anketës Strukturore të Ndërmarrjeve, prodhuesit e shërbimeve pësuan edhe goditjen më të madhe duke dhënë një ndikim negativ prej 3,1 %, të ndjekur nga prodhuesit e të mirave me 2 % pikë përqindje.

Ndërkohë sektori i tregtisë zuri peshën më të lartë të shitjeve neto me 48 %, i ndjekur nga sektori i ndërtimit me 12 %.