Shqipëria e Kosova me bashkëpunim të dobët ekonomik

Eksportet e Shqipërisë me Kosovën kanë rënë 25% në periudhën janar-nëntor 2016, krahasuar me të njëjtën periudhë të një viti më parë, ndërsa importi, sipas Institutit të Statistikave, pësoi rritje me vetëm 3%

Bashkëpunimi në mes Shqipërisë dhe Kosovës nuk është në nivelin e dëshiruar.

Eksportet me Kosovën kanë rënë 25% në periudhën janar-nëntor 2016, krahasuar me të njëjtën periudhë të një viti më parë, ndërsa importi, sipas Institutit të Statistikave, pësoi rritje me vetëm 3%, shkruan “TCH”.

Rënia e shkëmbimeve tregtare ka shqetësuar bizneset e dy vendeve, të cilat thonë se hapësirat boshe po i shfrytëzojnë vendet e tjera të rajonit, duke nënkuptuar serbët, përcjell albinfo.ch.

“Kemi një thjeshtim të pamjaftueshëm të procedurave lidhur me sistemin doganor dhe as Shqipëria e as Kosova nuk janë në statusin që të jenë konkurruese në rajon me produktet e tyre. E gjithë pengesa është mungesa e suportit dhe politikave subvencionuese”, është shprehur kreu i Dhomës së Tregtisë në Shqipëri, Nikolin Jaka.

“Shumë vende të rajonit e më gjerë janë shumë agresive dhe është më e lehtë të depërtosh kur përçan dhe sundon, ndaj duhet vërtetë të jemi shumë më aktivë”, ka thënë Safet Gërxhaliu, kryetar i Odës Ekonomike të Kosovës.

Bizneset në të dy anët e kufirit që flet shqip tashmë kërkojnë aksion dhe jo fjalë, si dhe besim tek produktet shqip.