Shqipëria e Maqedonia e Veriut nënshkruan 21 marrëveshje

Shqipëria dhe Maqedonia e Veriut zgjodhën Shkupin sot për të zhvilluar mbledhjen e përbashkët të dy qeverive. Aty u nënshkruan 21 marrëveshje dhe memorandume bashkëpunimi dhe mirëkuptimi mes dy vendeve.

Marrëveshjet synojnë dakordësimin e hapave të përbashkët dhe zgjerimin e hapësirave të bashkëpunimit mes Shqipërisë dhe Maqedonisë së Veriut, në fushën e ekonomisë, mbrojtjes, arsimit, kulturës, digjitalizimit dhe ntegrimit evropian

Kryeministri shqiptar, Edi Rama deklaroi sot nga Shkupi se me Portin e Thatë të Strugës krijohet një infrastrukturë komplekse në funksion të rritjes së volumit të ndërveprimit mes dy vendeve.

Në konferencën e përbashkët për media me kryeministrin e Maqedonisë së Veriut, Dimitar Kovaçevski, në përfundim të mbledhjes së përbashkët të dy qeverive, Rama u ndal te marrëveshjet e nënshkruara sot mes dy vendeve.

“Kemi dakordësuar edhe tre nisma të propozuara nga zv/kryeministri i parë Artan Grubi, që kanë të bëjnë në mënyrë të drejtpërdrejtë me ndërtimin e infrastrukturës së “Korridorit 8”, ndërtimin e një “Porti të Thatë” në Strugë dhe hapjen e vendkalimit të parë kufitar Strugë-Pogradec”, përcjell albinfo.ch.